Kultura

Ballina / Kultura / Kultura
Arti kosovar pëlqehet në Egjipt
Enver Sadiku Publikuar: 06.04.2014 - 08:57

Avni Behluli, skulptor i njohur kosovar, ka qenë pjesë e “ART in Cairo 2014” (Participate international artists residency), të mbajtur në kryeqytetin e Egjiptit në Kajro, përkrah artistëve nga tre kontinente, Azia, Afrika dhe Evropa, e cila është përfaqësuar nga tri shtete, Kosova, Sllovakia dhe Holanda e që përfaqësues nga Holanda ishte artisti me prejardhje shqiptare Shefqet Avdush Emini.

Behluli, ka thënë se për një muaj është bërë një punë e madhe artistike në disa fusha, janë organizuar punëtori, janë vizituar galeri dhe muze të Kajros dhe ka pasur bashkëpunim të ngushtë me artistë vendas.

Punimet e artistëve janë prezantuar në Qendrën Kulturore të Kajros e më pas do të prezantohen edhe në Vjenë e Sllovaki.
“Vizita e Kajros ka qenë shumë e frytshme dhe me interes reciprok, sepse jemi njohur me zhvillimet e artit pamor në të gjitha fazat e zhvillimit të Egjiptit, por edhe me kulturën, lashtësinë, arkitekturën egjiptiane”, ka thënë Behluli. A ka treguar se kishte prezantuar si është më së miri artin kosovar para egjiptianëve dhe artistëve të tjerë me qasjen e punës, teknikën, motivet dhe llojllojshmërinë kreative.

“Nga ky aktivitet janë bërë ura lidhëse mes Kosovës, Egjiptit dhe shteteve të tjera pjesëmarrëse. Unë personalisht kam marrë një eksperiencë nga ky aktivitet, por edhe kam dhënë shumë, duke vlerësuar artin tim në një formë ambasadori dhe shpesh edhe me flamurin e Kosovës”, tha Avni Behluli.

Edhe piktori shqiptar, që përfaqësoi Holandën, Shefqet Emini dëshmoi se gëzon respekt të madh në Egjipt dhe me punën e tij krijuese është i njohur jo vetëm në Egjipt, por edhe më gjerë. Për artistët u bënë ftesa që edhe në ardhmen të marrin pjesë nëpër ekspozita, punëtori e simpoziume, ngase ata dëshmuan se arti kosovar nuk mbetet mbrapa botës.

 


Komento
Komente (0)

Shkruaje emrin

Shkruaje email adresen

Shkruaje vendin
Shkruaje komentin
1000
Dërgo komentin
Me shume nga Kultura